Picasso, ‘n Boran-bul van Hurwitz Farming, was elke week tydens die openingstonele van Landbouweekliks op televisiestelle in Suid-Afrika te sien en het verskeie veilingrekords gehou, waaronder ‘n Suid-Afrikaanse rasrekord vir die hoogste prys op ‘n veiling vir semen betaal. Picasso het in Maart vanjaar vir die derde jaar agtereenvolgens sy eie rekord verbeter toe die Ntaba Nyoni-stoetery van pres. Cyril Ramaphosa R33 000 per strooitjie vir 12 strooitjies van sy semen betaal het.

“Picasso was waarskynlik die herkenbaarste en bekendste bul in Suid-Afrika. Staatsveeartse, besoekers, kopers, almal wat op die plaas gekom het, wou eers vir Picasso sien voor hulle met die doel van hul besoek voortgegaan het,” sê mnr. Simeon Hurwitz, besturende direkteur van Hurwitz Farming naby Davel in Mpumalanga. Picasso is uit die hoog aangeskrewe bul Rembrandt en die superkoei Segera geteel en het homself vanaf 2016 as die hoeksteen van die hele Hurwitz-Boran-stoetery gevestig.