Die onsekere energie landskap in Suid-Afrika het verreikende gevolge vir die landboubedryf, wat reeds onder druk verkeer. Onbetroubare elektrisiteitsvoorsiening, toenemende energiepryse en Eskom se finansiele posisie dwing boere om kreatiewe oplossings te soek om ekonomies en met toekomssekerheid te funksioneer.

Claude Peters van RenEnergy Africa sê die toekoms van energie in die landbou is ’n sleutelkwessie, maar sonder daadwerklike nasionale leiding, is dit moeilik om te voorspel. “Die energiekrisis veroorsaak onsekerheid, en Eskom se onvoorspelbare bestuursbesluite maak langtermynbeplanning moeilik.” Daar is tans ’n toename in private, selfopgewekte energie-inisiatiewe soos sonkrag, wat met deeglike beplanning en ingenieursontwerpe in afsondering landbou-energiebehoeftes kan dek. Dit veroorsaak egter ’n groot aanvanklike kapitale belegging wat nie noodwendig deel vorm van ’n boer se begroting nie. Oor die lang termyn maak dit absoluut sin en daarom is alternatiewe finansiering van sulke projekte ’n groot oorweging. Dit gee die boer die geleentheid om sy kapitaal binne in die besigheid aan te wend.”

Peters verduidelik dat as die huidige geldnood in Eskom en munisipaliteite voortduur, industrie in die toekoms ander kostestrukture gaan sien, soortgelyk aan die Europese model, waar vaste administrasiekoste ’n baie groter persentasie van jou maandelikse rekening gaan vorm. Hierdie veranderinge kan egter problematies wees vir seisoenale boerderye, soos wynplase, wat slegs vir ’n beperkte deel van die jaar baie elektrisiteit benodig, maar ’n volle jaar se administrasiekoste betaal, gegrond op die hoë verbruiksperiode.